Zidane yakorewe ikibumbano basa mu buryo butangaje

Umunyabigwi w’Umufaransa, Zinédine Zidani Zizou wamenyekanye cyane kubera gukina no gutoza umupira w’amaguru yakorewe ikibumbano gisa nawe neza cyashyizwe mu ngoro ndangamateka y’ibyamamare iri mu Bufaransa.

Birasaba kurebana ubushishozi kugira ngo utandukanye Zidane n’ikibumbano cye

Uyu munyabigwi Zinédine Zidane si ubwa mbere akorewe ikibumbano ariko muri iyi ngoro izwi nka Musée Grévin, kuri iyi nshuro hakozwe ikibumbano gisa nawe neza ku buryo bisaba gushishoza kugira ngo umenye neza Zidane wa nyawe ubireba ku ifoto.

Ni ikibumbano cyagaragajwe kuri uyu mugoroba wo kuri uyu wa Gatatu, tariki ya 25 Ukwakira 2022, mu ngoro ya Grévin mu Bufaransa.

Iki kibumbano cyambaye ikoti ry’umukara n’ishati y’umukara idafite karuvati, amaboko mu mifuka. Cyamuritswe mu birori byibatabiriwe na nyir’ubwite Zinedine ndetse n’umuryango we.

Uyu munyabigwi wagacishijeho yavuze ko ari ibintu by’igitanganza kubona yakorewe ikibumbano nk’icyo muri Grévin Museum

Ati “Inshuro ya mbere byari nyuma 1998 kandi byari byiza ariko sinari nzi ko bizahoraho ku buryo ngaruka uyu munsi kubera iki kibumbano kindi cyambaye ikote n’agasatsi gakeya.”

Yakomeje yishimira ibyo yakorewe n’akazi katoroshye kakozwe, asobanura ko ari ibyishimo bikomeye cyane kuba muri ibi birori yabonye umwanya wo kwishimana n’umuryango we.

Ati “Bigaragaza ko ahazaza hanjye hakomeje kandi ndabyishimiye. Ntabwo mpora mbona umwanya nk’uyu wo kuba turi kumwe, biragoye kubona Mama na Papa basohotse, rero ni ijoro ry’umunezero ahangaha ndi kumwe na bo n’inshuti.”

Zinédine yishimiye ko iki kibumbano cyamukorewe gisa neza nawe anashima abagize uruhare mu kugishyira muri iyi ngoro ndetse n’akazi gakomeye kakozwe kugira ngo kibeho.

Umuyobozi Mukuru w’Ingoro y’Amateka ya Grévin, Yves Delhommeau, yasobanuye ko batangiye kugitunganya mu 1999 nyuma y’igikombe cy’Isi ariko kigenda kivugururwa kugeza babonye ishusho bifuzaga.

Ati “Byakozwe mu 1999 nyuma y’igikombe cy’Isi cyabaye mu 1998, tugenda tukivugurura nko mu 2009, ariko ntabwo ikibumbano twari twarabashije kukireba kuko twari tutaragera aho twifuza. Uyu munsi turishimye kuko cyari icyifuzo twasabwaga n’abasura aha hantu buri munsi baturutse hirya no hino ku Isi.”

Yavuze ko muri iyi ngoro harimo abandi babiri bakorewe ibibumbano bivuze ko icya Zinedine Zidane cyakozweho ari icya gatatu nyuma ya Général de Gaulle n’Umwamikazi w’u Bwongereza kandi ko kuba Zidane arimo bizatuma ahora mu mateka y’u Bufaransa.

Uretse kuba umukinnyi w’ikirangirire, mu butoza uyu mugabo nabwo yaje guhirwa ubwo yatozaga Real de Madrid yo muri Espagne ayifasha kwegukana ibikombe bitatu bikurikirana bya Champions League kuva 2015 kugeza 2018 iba iya mbere ibitwaye inshuro eshatu zikurikiranye.

Mu mwuga wo gutoza kandi yatwaye ibikombe bibiri bya La Liga (Shampiyona y’icyiciro cya mbere muri Espagne anahabwa ibihembo bibiri by’umutoza witwaye neza ku Isi.

Zidane yakorewe ikibumbano basa cyane

Yanditswe na Jean Damascene Nsengiyumva

Leave a Reply

Your email address will not be published.