Abagabo bane muri batandatu bafashe umukobwa ku ngufu bakanamwica, bishwe bamanitswe

Abagabo bane b’Abahinde bahamwe n’icyaha cyo gufata ku ngufu umukobwa umwe ari benshi no kumwica mu 2012 baraye bishwe bamanitswe.

Aba bagabo bahawe iki gihano muri gereza yo mu murwa mukuru yitwa Tihar, iki gihano ni ubwa mbere gitanzwe mu Buhinde kuva mu 2015.

Umukobwa bahohoteye yishwe n’ibikomere hashize iminsi afashwe ku ngufu n’abagabo batandatu icya rimwe bari mu modoka ya bisi iri kugenda.

Iki gikorwa cyateye umujinya rubanda ndetse gituma Ubuhinde buvugurura amategeko ahana ibi byaha.

Akshay Thakur, Vinay Sharma, Pawan Gupta na Mukesh Singh mu 2013 nibwo bakatiwe igihano cy’urupfu.

Abantu batandatu barafashwe nyuma y’ubu bugizi bwa nabi. Umwe muri bo, Ram Singh, basanze yapfuye ari muri gereza mu 2013, bivugwa ko yiyahuye.

Undi, yari umusore w’imyaka 17 ubwo ibyo byabaga, yarekuwe mu 2015 amaze imyaka itatu afunze, igifungo kiruta ibindi mu Buhinde ku bana.

Mu mezi macye ashize, aba bane basigaye bari bajuririye iki gihano bakatiwe mu rukiko rw’ikirenga basaba ko nibura bakatirwa gufungwa ubuzima bwose.

Gusa uru rukiko ruruta izindi rwanze ubujurire bwabo bituma nta handi bashobora kuregera.

Ubujurire bwabo bwanzwe ejo habura amasaha macye ngo banyongwe.

Iminota micye nyuma y’uko bicwa kuri uyu wa gatanu mu gitondo, nyina wa Nirbhaya yagize ati: “Nahobeye ifoto y’umukobwa wanjye ndamubwira nti amaherezo tubonye ubutabera”. Se yavuze ko ubu “yongeye kugirira ikizere ubutabera”.

Leave a Reply

Your email address will not be published. Required fields are marked *